O secretario xeral do PSdeG, Gonzalo Caballero, apelou este domingo a que haxa unha “mobilización masiva” da esquerda o próximo 10 de novembro, día en que se celebrarán eleccións xerais en España, fronte ao “risco” de que “as tres dereitas” –PP, Ciudadanos e Vox– somen maioría absoluta e que Pablo Casado goberne como “un monicreque de Abascal”.

Diso advertiu o líder dos socialistas galegos durante un mitin de campaña celebrado en Vigo coa presenza da portavoz do PSOE no Congreso e vicesecretaria xeral do partido, Adriana Lastra. No acto tamén interviñeron o alcalde olívico, Abel Caballero; o secretario do PSOE da provincia de Pontevedra, David Regades; e o número uno ao Congreso por esta circunscrición, Olga Alonso.

Fronte a un auditorio cheo de simpatizantes, alcaldes e membros do PSdeG-PSOE, Gonzalo Caballero expresou a súa “preocupación” porque goberne en España “unha coalición das dereitas coa extrema dereita”, que é “xenófoba e machista”, que “fala de levantar muros” nas fronteiras e que “non quere falar de violencia machista”.

Por iso, e porque Vigo, Pontevedra, Galicia e España “non queren retroceder” senón “avanzar”, pediu o voto para o PSOE con Pedro Sánchez á cabeza, porque son o partido e o candidato “da igualdade de oportunidades” e “da liberdade”.

Neste contexto, o secretario xeral do PSdeG destacou medidas implementadas polo Executivo socialista desde que chegou á Moncloa en xuño de 2018, como a “suba das pensións”, a “universalización” da sanidade pública, a dotación de “máis bolsas” na educación pública e a “loita contra a violencia machista”, entre outras.

“OS 11 ANOS NEGROS DE FEIJÓO”

“O voto útil é o voto ao Partido Socialista”, asentou Caballero, quen ademais advertiu que, tras a histórica vitoria do PSdeG-PSOE en Galicia o pasado 28 de abril, “hai unha nova maioría social e de progreso” que “non se quere resignar aos 11 anos negros” do popular Alberto Núñez Feijóo como presidente da Xunta.

Fronte a un PPdeG que “abandona o medio rural”, que “mente” cando fala do financiamento autonómico e que “confronta” co sector industrial, valorou que desde que o PSOE chegou ao Goberno “non houbo nin un minuto de atraso” nas obras do AVE a Galicia.

Neste sentido, esgrimiu que a exministra de Fomento Ana Pastor, cabeza de lista do PP ao Congreso por Pontevedra ata os anteriores comicios, deixou o proxecto da alta velocidade “tres anos no caixón”. Segundo Gonzalo Caballero, esta é a razón de que Pastor “fuxa” de Galicia e o próximo 10 de novembro figure como número dous dos populares por Madrid.

ABEL CABALLERO

Neste asunto profundou o alcalde de Vigo, Abel Caballero, durante a súa intervención: “Cando escoito ao PP culpar a Pedro Sánchez do atraso do AVE a unha parte de Galicia, quen me vén á mente é o PP, que mentres gobernou tivo o AVE metido nun caixón“.

Tras vaticinar que os socialistas serán os gañadores das eleccións tanto en España como en Galicia de novo, o rexedor puxo o foco na necesidade de “reverter o que durante tantos anos fixo” o Goberno de Rajoy cos “seus recortes”. “O PP, cando goberna, só goberna para unha parte de España e outros quedan tirados nas cunetas da pobreza”, lamentou.

PIDE A FEIJÓO QUE ACUDA A BARRERAS

Seguidamente, acusou ao líder do PP en Galicia, Alberto Núñez Feijóo, de “culpar” dos problemas industriais de Galicia a un Executivo estatal “que leva escasamente 15 meses gobernando en minoría”. Así, Caballero individualizou esta crise no preconcurso do estaleiro de Hijos de J. Barreras, en Vigo, e explicou: “Estamos todos buscando solucións. Todos menos o presidente da Xunta, que non veu nin unha soa vez”.

“Quero que (Feijóo) veña aquí, que veña ao estaleiro e se enfronte aos traballadores que perderon o seu emprego e lles fale. E eu estarei con el”, reclamou.

No mitin tamén interveu a cabeza de lista do PSOE por Pontevedra ao Congreso, Olga Alonso, quen apelou ao voto socialista “polo pasado, o presente e o futuro”.

“O vindeiro domingo temos que ir votar, a votar ao Partido Socialista por catro anos de estabilidade, por formar un Goberno forte e progresista que permita os mellores avances”, sentenciou.