O concelleiro do BNG de Vigo, Xabier P. Igrexas, lamentou este venres a “gravísima situación de crise industrial” que, ao seu xuízo, vive a cidade de Vigo e a súa comarca e puxo o foco na “desertización” da base produtiva da cidade olívica, cunha “continua destrución de postos de traballo” e unha “precarización” das condicións laborais.
Así o sinalou Igrexas nun audio difundido aos medios polos nacionalistas despois de reunirse coa executiva comarcal de Vigo da Confederación Intersindical Galega (CIG), a quen lles trasladou o apoio do BNG á manifestación convocada o próximo 30 de outubro baixo a lema ‘SOS Vigo. Polo futuro industrial da comarca’.
Xabier P. Igrexas destacou o “compromiso firme” do Bloque de representar no Congreso dos Deputados a Galicia para “tombar” a reforma laboral, a reforma da negociación colectiva, así como a reforma das pensións. Tamén para que se declare “sector estratéxico” a construción naval galega e que se garanta a produción mediante a intervención pública directa.
