O alcalde de Vigo, Abel Caballero, saíu este venres ao paso das críticas de PP e Marea de Vigo, sobre os seus primeiros 100 días de goberno neste cuarto mandato, e proclamou: “Para min non hai cen primeiros días, hai 4.486 días, e neste tempo revolucionamos a cidade”.
O rexedor defendeu que os seus gobernos propiciaron “o maior cambio que se deu en ningunha cidade de Europa”, e fixo un repaso das súas principais actuacións, facendo fincapé, nesta xornada de folga mundial polo clima, nas iniciativas ambientais.
A ese respecto, Caballero presumiu do impulso á candidatura de Cíes para ser designada Patrimonio da Humanidade, puxo en valor que Vigo conte cunha nova depuradora “paga pola cidade e pola UE”, e lembrou que o seu goberno plantou no centro urbano unhas 6.000 árbores e outros 40.000 en zonas forestais, que aposta pola mobilidade sustentable cun carril bici, que ten “as mellores e máis coidadas praias”, que puxo fin ás verteduras no río Lagares, ou que recuperou máis de 300.000 metros cadrados de humidais.
Así mesmo, recalcou outras actuacións como o desenvolvemento do Barrio do Cura, as medidas de política social, a ‘humanización’ de mil rúas, ou o “recoñecemento” ao modelo de Vigo, concretado na súa reelección como presidente da Federación Española de Municipios e Provincias.
Por contra, os partidos da oposición (PP, Marea e BNG) “sempre estiveron en contra de Vigo nos temas importantes” e, no caso do PP, “non teñen ningún apego á cidade”, porque os seus portavoces “veñen, perden e vanse”. “Eles seguirán cambiando, e nós continuaremos gobernando Vigo”, sentenciou.
