O PP de Vigo denunciou este venres que unha das actuacións previstas dentro do proxecto de desenvolvemento turístico de Bouzas non chegará a executarse con cargo á subvención concedida para esta iniciativa. Trátase da compra e instalación de mupis informativos, un contrato que fora licitado por 84.000 euros e que finalmente non será adxudicado.

Segundo explicou a formación popular, a Xunta de Goberno Local acordou este venres deixar sen adxudicar o contrato ante a imposibilidade de completar a actuación dentro dos prazos establecidos pola axuda. O PP sostén que esta circunstancia queda recollida no propio expediente administrativo e considera que o episodio pon en perigo parte do programa deseñado para impulsar Bouzas como destino turístico.

A presidenta do PP vigués e portavoz municipal, Luisa Sánchez, relacionou esta decisión coa recente perda, segundo a súa formación, de máis de 300.000 euros previstos para a reforma da Rúa do Pazo. Para os populares, ambos os casos responden a dificultades do goberno municipal para executar a tempo proxectos vinculados a subvencións.

“Despois de perder recentemente os máis de 300.000 euros para a reforma da Rúa do Pazo”, a actuación prevista en Bouzas “suma un novo golpe pola decisión do goberno local de non adxudicar o contrato para a compra e instalación de mupis”, afirmou Sánchez.

Os paneis informativos formaban parte dun proxecto turístico máis amplo, cun orzamento de dous millóns de euros concedidos pola Xunta, segundo detallou o PP. A iniciativa contempla distintas intervencións orientadas á promoción e á mellora de servizos no barrio vigués.

Entre as medidas incluídas figuran o impulso da festa da Brincadeira, a creación ou mellora dun paseo litoral e a implantación dun novo sistema de recollida selectiva porta a porta, ademais dos mupis que agora quedan fóra da adxudicación prevista.

Sánchez asegurou que o programa “se vai desinchando” e responsabilizou desta situación ao executivo local. A portavoz popular cuestionou tamén se o Concello renunciará definitivamente á instalación destes elementos ou se optará por financialos con recursos municipais.

“E agora que pasa con Bouzas? Vai deixala sen os mupis só pola súa incompetencia? Ou vai facer que os paguemos todos os vigueses do noso peto como noutras ocasións? Tanto presumir de Bouzas como destino turístico para logo deixala tirada”, declarou.

O PP cifra en máis de 4,5 millóns outras axudas devoltas

A formación popular enmarca este novo contrato frustrado nunha relación máis ampla de subvencións concedidas a proxectos vigueses que finalmente tiveron que ser devoltas ou non se executaron, segundo os datos achegados polo propio partido.

Sánchez cifra en máis de 4,5 millóns de euros o importe acumulado correspondente a diferentes iniciativas. Entre elas cita axudas destinadas á reforma do Mercado de Teis, á intervención nos parques infantís de Camilo José Cela e O Berbés e á creación dunha plataforma dixital para o comercio local.

Esta última iniciativa fora presentada polo goberno local como unha ferramenta de venda por internet para os establecementos da cidade que, segundo indicara no seu momento o alcalde, Abel Caballero, aspiraba a competir con plataformas como ‘Amazon’.