O alcalde de Vigo, Abel Caballero, esixiulle este martes á Xunta de Galicia que, do mesmo xeito que achega 3 millóns de euros anuais a Santiago por ser capital da comunidade, debe achegar 9 millóns ao ano á cidade olívica en concepto de “cidade máis importante de Galicia”. Así o trasladou o rexedor nunhas declaracións remitidas aos medios, nas que sinalou que o Goberno autonómico vén de incrementar esa achega a Santiago nun 11 %, ata alcanzar os 3 millóns de euros.

“Polo tanto, Santiago ten capacidade, con eses 3 millóns que lle dá a Xunta, para contratar voos, ou destinaranos ao que queiran”, afirmou Caballero. O alcalde incidiu en que, ademais, o feito da capitalidade achega á cidade compostelá un “enorme valor engadido” porque, entre outros factores, “alí están todos os funcionarios, que cotizan para o Concello”.

“Ben, pois se a Santiago o apoian con 3 millóns de euros en concepto de capitalidade, a Vigo téñeno que apoiar con 9 millóns de euros en concepto de cidade máis importante de Galicia. Téñennos que dar 9 millóns de euros. Por que? Porque somos a cidade máis importante de Galicia”, sentenciou o rexedor, que engadiu que ese “parece un motivo suficiente”.

Caballero precisou que non cuestiona o apoio económico a Santiago, mais si a falta de apoio a Vigo. Neste sentido, aproveitou para volver denunciar que o Goberno galego non queira subvencionar voos desde Peinador, como si fan, segundo lembrou, outras institucións autonómicas noutras cidades. O alcalde volveu criticar a proposta de investir en promoción de destino, que cualificou de “parvada” e de “tomadura de pelo”, e insistiu en que, ao seu xuízo, a Xunta non quere apoiar o aeroporto de Peinador.