A cidade de Ourense e outros 35 concellos de menor tamaño en Galicia non remitiron ao Ministerio para a Transformación Dixital e da Función Pública a información sobre o soldo dos seus alcaldes. Así se desprende dos datos da estatística sobre Información Salarial de Postos da Administración (ISPA) publicada polo departamento estatal con datos de 2024.
En concreto, a cidade de Ourense, con Gonzalo Pérez Jácome (Democracia Ourensana) como alcalde e con máis de 100.000 habitantes, é o único municipio de gran tamaño en Galicia que non remite os datos. E é que, só cinco dos restantes 35 consistorios que figuran na estatística sen remitir os datos teñen máis de 10.000 habitantes: Cambre (24.781), Moaña (19.351), Verín (13.798), Vilalba (13.787) e Salvaterra de Miño (10.471).
Pola súa banda, outros cinco teñen entre 10.000 e 5.000 habitantes: Burela (9.547), Valdoviño (6.852), Ares (6.156), Ponteceso (5.318) e Ribadumia (5.212). Os restantes 25 son pequenos concellos de menos de 5.000 veciños: Amoeiro, Begonte, Carballeda de Valdeorras, Catro Caldelas, Catoira, Chandrexa de Queixa, Cortegada, Dozón, Friol, Guntín, Melón, A Mezquita, Paderne de Allariz, Palas de Rei, A Peroxa, Ribas de Sil, A Rúa, Sarreaus, Taboada, Taboadela, Trasmirás, O Valadouro, Vila de Cruces, Xinzo de Limia e Xunqueira de Ambía.
O DE VIGO, O REXEDOR QUE MÁIS COBRA
Segundo os datos do Informe, os alcaldes de varias das cidades galegas son os que maior soldo perciben, sendo o Vigo, Abel Caballero, con 78.206 euros en todo o 2024, o mellor retribuido. Séguenlle de preto a alcaldesa da Coruña, Inés Rey, con 77.531,72 euros; e Lugo, Miguel Fernández, con 75.773,74 euros.
Sitúanse por enriba dos 60.000 euros os rexedores doutros municipios galegos, como a de Marín, María Ramallo, que percibiu 65.296 euros en 2024; o de Arteixo, Carlos Calvelo, que cobra un salario de 55.048,48 euros; e o de Oleiros, con 63.239,96, Ángel García Seoane. Ademais, aínda que hai un erro na contía que figura no documento como soldo da alcaldesa de Santiago, Goretti Sanmartín, tal e como comprobou Europa Press, o salario da rexedora compostelá situouse nuns 66.288 euros en 2024.
