A sesión ordinaria do Pleno de Vigo deste luns foi suspendida temporalmente debido ás protestas de traballadoras do Servizo de Axuda non Fogar (SAF), que reclamaban mellores condicións laborais, protocolos de seguridade e maior investimento no servizo. A suspensión produciuse tras a votación dunha moción do BNG, que foi rexeitada, co apoio só do grupo nacionalista, a abstención do PP e o voto contrario do PSOE.

Durante a protesta, as traballadoras mostraron carteis reivindicativos e corearon consignas exixindo dereitos laborais e salarios dignos, o que levou á primeira tenente de alcalde, Carmela Silva, a ordenar o desaloxo por parte da Policía Local e suspender momentaneamente a sesión. Ao retomar o pleno, Silva denunciou “insultos e ton ameazante” cara a concelleiras, considerando o comportamento como “absolutamente antidemocrático” e advertindo que situacións similares poderían repetirse antes das eleccións municipais de 2027.

A moción do BNG instaba á Xunta a reverter recortes no financiamento do SAF, aumentar o orzamento para atender as persoas usuarias, mellorar as condicións laborais e garantir a seguridade mediante protocolos específicos. Tamén solicitaba ao Concello maior control sobre o servizo, incluíndo a posibilidade de suspendelo en situacións de risco e estudar a súa prestación a través dunha empresa pública municipal.

No debate, a concelleira de Benestar Social, Yolanda Aguiar, acusou á Xunta de usar fondos públicos para “facer caixa” e responsabilizou ao PP dos recortes, mentres o concelleiro popular Fernando G. Abeijón defendeu que a administración autonómica aumentou os orzamentos de políticas sociais e reprochou ao Goberno local a infrafinanciación do SAF.