O BNG de Vigo confirmou a presentación dunha moción para o próximo pleno na que esixe o fin do “abandono” das instalacións deportivas municipais e medidas urxentes para reparar as deficiencias que presentan, de maneira que se poida garantir a súa apertura e a atención aos usuarios.

O portavoz municipal nacionalista, Xabier Pérez Igrexas, denunciou que o goberno local mantén esas instalacións nunha situación “calamitosa” e avanzou que a moción do seu grupo inclúe tamén a reprobación ao concelleiro de Deportes, Manel Fernández pola súa “xestión nefasta”.

O edil nacionalista referiuse ao estado “ruinoso” das pistas de atletismo de Balaídos, á falta de iluminación no campo da ETEA, aos “problemas estruturais” de varios pavillóns, e ao peche da piscina de Teis, que se alonga xa por máis de tres anos.

Igualmente, lembrou que os ximnasios da Carmen, O Berbés e Samil sofren peches de forma continua, obrigando aos usuarios a pagar por un servizo que non gozan, o que supón “unha falta de respecto á cidadanía”.

Para Pérez Igrexas, detrás desta situación está a redución do persoal municipal no último ano e a privatización dos servizos.