O alcalde de Vigo, Abel Caballero, acusou ao presidente da Xunta, Alfonso Rueda, de “traizoar a Vigo” ao dicir ‘non’ á proposta “de boa fe” do Goberno para construír vivenda de protección na Comunidade. Nun audio enviado aos medios de comunicación, o rexedor criticou que Rueda non aceptase a iniciativa do Executivo central, que se ofrecía a financiar o 62 % das vivendas construídas en Galicia, mentres a Xunta achegaba o 38 % restante.

“Rueda no canto de porse á beira de Vigo e dicir si (…), dixo que non, incomprensiblemente”, apostilou Caballero, subliñando que suporían “centos de millóns” e “centos de vivendas” para a cidade. Por iso, anunciou que pedirá ao Goberno que destine a Vigo a cantidade que lle correspondería e que se encargará o Concello de xestionala e construír as vivendas. Para iso, pedirá á Xunta as competencias na materia, que corresponden á Comunidade, segundo dixo o alcalde no mesmo audio. “Confío en que o señor Rueda, que non as quere facer el, non vai ter problema en que as fagamos desde o Concello”, sentenciou Abel Caballero.