O alcalde de Vigo, Abel Caballero, confirmou este mércores a convocatoria dun pleno extraordinario para o próximo 12 de xuño, co fin de reclamar á Xunta que habilite unha partida de 5 millóns de euros nos próximos orzamentos autonómicos para implantar o grao de Medicina na cidade olívica. En declaracións remitidas aos medios, o rexedor reclamou ao goberno galego esa dotación orzamentaria para “iniciar de forma inmediata” o proceso de implantación dunha nova facultade de Medicina na Universidade de Vigo, para que estea “operativa” no curso 2027-2028.
Por iso, no pleno do 12 de xuño, o goberno local esixirá que se inicien os trámites para crear a facultade, con 5 millóns de euros para a súa construción e posta en marcha, e que se establezan os hospitais de Vigo e, eventualmente, de Pontevedra e Ourense, para as prácticas e docencia hospitalaria. Ademais, Caballero advertiu de que esa partida para pór en marcha o grao de Medicina en Vigo debe ser adicional ao financiamento da UVigo, e non detraerse das partidas existentes. “Non pode ser que a cren diminuíndo partidas orzamentarias doutras facultades e da Universidade”, puntualizou.
Finalmente, o alcalde volveu repetir que Vigo “é a máis importante cidade de España que non ten Facultade de Medicina”, algo que cualificou de “agravio”, porque a urbe olívica “ten unha área poboacional en termos de universidade dun millón de persoas”. “E ese millón de persoas ten o dereito de poder optar a ter e estudar a carreira de Medicina na propia Universidade de Vigo. E por tanto, levaremos ao pleno a reclamación dos dereitos de Vigo a ter unha Facultade de Medicina”, sentenciou.
