O BNG de Vigo volveu a pedir este martes que se remunicipalice o servizo de bus urbano na cidade, aproveitando o fin da concesión e a prórroga técnica que se dará á actual concesionaria, Vitrasa, mentres se licita un novo contrato (que entraría en vigor en xaneiro de 2026). Así o trasladou o portavoz municipal nacionalista, Xabier Pérez Igrexas, tras manter unha reunión co comité de empresa de Vitrasa, e reclamou que se aproveite esta “oportunidade” para converter este servizo nun servizo de xestión pública, algo viable á vista da “fortaleza económica” do Concello, “da que tanto presume o alcalde”.
O edil do BNG pediu que se constitúa unha empresa municipal de transporte urbano, como se fixo noutra cidade, para cambiar o modelo de servizo, que actualmente presenta “enormes deficiencia”, como a redución de 250 frecuencias desde a pandemia de Covid, un mapa de liñas “obsoleto”, as condicións “precarias” do seu persoal, ou o feito de que ten o billete “máis caro” das cidades galegas. Por outra banda, tras o anuncio do goberno local de que se iniciou a tramitación dunha nova licitación do servizo, Pérez Igrexas denunciou o “preocupante escurantismo” que rodea a este anuncio.
Así, lembrou que nada se sabe do estudo de mobilidade encargado polo goberno municipal e que, en teoría, ía servir de base para o deseño dos novos pregos e a actualización de liñas. Por outra banda, tamén censurou que se elevará o custo do servizo, que actualmente ten un custo duns 24 millóns de euros ao ano, pasando a custar 45 millóns; e alertou contra “posibles recortes” insinuados “de maneira sutil” polo goberno local, e que poderían afectar as conexións de bus nas parroquias. Finalmente, Pérez Igrexas criticou que se anuncie unha nova licitación do servizo con “nulo diálogo”, xa que hai 5 anos que non se convoca o Consello Sectorial de Transportes, e non houbo interlocución nin co movemento veciñal nin co comité de empresa da concesionaria.
