O pleno de Vigo aprobou este luns, só cos votos a favor do PSOE e a abstención do BNG e do PP, unha moción socialista para instar o presidente da Xunta, Alfonso Rueda, “apoio” para esixir á Real Federación Española de Fútbol (RFEF) a publicación dos criterios e puntuacións das candidaturas presentadas polas cidades para ser sede do Mundial 2030.
Na moción, o PSOE tamén pedía a Rueda o “cesamento inmediato” do conselleiro de Presidencia, Diego Calvo; explicacións do presidente da Federación, Rafael Louzán, e o rexeitamento das declaracións da presidenta do PP de Vigo, Luisa Sánchez, cando falou das “carencias” da candidatura.
Foi o concelleiro Carlos López Font o encargado de defender esta iniciativa, insistindo no proxecto “sólido” presentado polo Concello e na suposta “actuación coordinada de inimigos da cidade” para excluír a candidatura olívica, apuntando cara a Louzán.
Pola súa banda, Xabier Pérez Igrexas, do BNG, tachou de “moi graves e preocupantes” as últimas informacións sobre as sedes do mundial, lamentando o “cruzamento de acusacións” e instando os socialistas a aceptar unha emenda para chegar a un acordo “unánime”, que foi rexeitada.
Desde o PP, Luisa Sánchez criticou que o PSOE busque “ruído mediático” no canto de que se aclare o ocorrido, insistindo en que o goberno de Abel Caballero “non conseguiu nada” nos últimos meses, tras coñecerse que Vigo quedou fóra das sedes do mundial.
Precisamente Sánchez foi a encargada de defender unha segunda moción sobre o tema debatida no pleno deste luns, que buscaba “tres acordos sen reproches” que pasaban por defender a candidatura de Vigo, esixir os baremos das votacións e abrir un proceso de interlocución entre Federación e Concello para tratar de solucionar a situación.
No entanto, o PSOE terminou por rexeitar esta moción, que contou co ‘si’ do PP e a abstención do BNG. Ao final do debate, Abel Caballero tomou a palabra durante preto de media hora para reiterar o seu rexeitamento á expulsión de Vigo como sede do mundial e para defender a candidatura como “excepcional”, atacando de novo á oposición .
CAMPAÑA DA RFEF
Por outra bandaa, a Real Federación Española de Fútbol (RFEF) anunciou este luns o lanzamento de ‘A coraxe das nosas’, unha campaña que rende homenaxe a esas ‘mulleres coraxe’ que forman o corazón de Galicia, “así no mar como no campo”, e con motivo do duelo entre as seleccións femininas de España e Portugal o próximo 8 de abril no Estadio ABANCA Balaídos de Vigo e correspondente á liga de Nacións.
