Os grupos municipais da oposición no Concello de Vigo, PP e BNG, rexistraron a solicitude para que se convoque un pleno extraordinario (para o que se necesita a firma de 7 edís) no que o alcalde da cidade, Abel Caballero, dea explicacións aos cidadáns sobre o ocorrido co patrocinio do concerto de Guns N’ Roses, despois dunha sentenza que condena ao Concello a abonar á promotora do evento case 2 millóns de euros que se comprometeu a pagarlle e que non lle abonou.
O portavoz do PP, Miguel Martín, sinalou nunha rolda de prensa que debe ser ante os representantes dos vigueses onde o rexedor debe explicar que ocorreu e “asumir responsabilidades políticas” derivadas da “gravísima sentenza” do contencioso administrativo.
Tras incidir en que dita sentenza puxo de manifesto que o procedemento para ese patrocinio, que acabou nun concurso “simulado” e declarado deserto, foi “unha chapuza”, o concelleiro ‘popular’ advertiu de que o seu grupo non permitirá que o alcalde “pase sobre este tema no bico dos pés”.
Nese sentido, denunciou que, tres semanas despois de coñecerse a resolución xudicial, o alcade non compareceu ante a prensa para dar explicacións e o goberno local limitouse a emitir un comunicado anunciando un recurso. “Aínda máis lamentable é que o alcalde lle falte ao respecto aos vigueses, porque as súas primeiras palabras sobre este asunto foron un programa de televisión nacional. Abel Caballero débese primeiro aos vigueses, non á audiencia de Risto Mejide”, apuntou, en alusión á intervención do rexedor no programa ‘Todo es mentira’, no que colabora.
“BALBUCEAR ABERTAS FALSIDADES”
Pola súa banda, o portavoz do BNG, Xabier Pérez Igrexas, que tamén compareceu ante os medios, puntualizou que o seu grupo sumou os seus edís aos do PP pola “necesidade técnica” de reunir as 7 firmas precisas para instar a convocatoria dun pleno extraordinario e “antepondo o interese público” ás diferenzas entre nacionalistas e ‘populares’.
Á marxe desa precisión, o edil do BNG incidiu tamén en que nin o alcalde nin ninguén do goberno local deron explicacións sobre ese patrocinio errado e que as únicas palabras respecto diso por parte do rexedor foron nun programa nacional de televisión, onde se limitou a “balbucear abertas falsidades”. “A quen ten que dar explicacións é aos vigueses, e non a Risto Mejide”, advertiu.
CESAMENTO DE CONCELLEIROS E COMISIÓN DE INVESTIGACIÓN
Por todo iso, os grupos da oposición reclamaron a convocatoria dese pleno extraordinario e, na súa solicitude, tamén propoñen a adopción de varios acordos.
En primeiro lugar, expoñen que o alcalde “pida perdón aos vigueses” polo dano causado á imaxe da cidade e tamén propoñen a súa reprobación pola súa “opacidade” nesta cuestión. Igualmente, esixen o “cesamento inmediato da concelleira de Contratación, Patricia Rodríguez Calviño, e que “se depure a responsabilidade” do que era concelleiro de Festas, Pablo Estévez.
Por outra banda, PP e BNG demandan a creación dunha comisión especial de investigación e que se adopten medidas de reforzo da transparencia en materia de contratación e de xestión dos recursos públicos no Concello, entre elas a creación dunha Oficina Municipal Anticorrupción.
Igualmente, os grupos da oposición reiteraron que os seus equipos xurídicos están a estudar a sentenza do contencioso administrativo e, á espera do que diga o goberno local no pleno extraordinario, non descartan acudir á vía penal.
De feito, por estes feitos xa houbo unha denuncia penal a finais de 2023 polos posibles delitos de prevaricación administrativa, malversación de fondos públicos, negociacións prohibidas a funcionarios e integración en grupo criminal, pero o xulgado rexeitou abrir un procedemento, ao non apreciar indicios de que se cometeron tales ilícitos. A Audiencia de Pontevedra confirmou a desestimación nun auto de outubro de 2024.
RESPOSTA DO GOBERNO LOCAL
Pola súa banda, o goberno municipal vigués respondeu ás demandas da oposición remitindo aos medios unhas declaracións gravadas do portavoz socialista, Carlos López Font, na que acusa ao BNG de estar “sempre á sombra” do PP.
Segundo manifestou, nacionalistas e ‘populares’ xa se aliaron na redacción do Plan Xeral de Ordenación Municipal (PXOM) cando gobernaba Corina Porro, un plan “cheo de pelotazos urbanísticos” e “agora seguen xuntos”.
Sobre a sentenza polo patrocinio errado do concerto de Guns N’ Roses, López Font limitouse a repetir que o Concello presentará recurso, “como tantos contenciosos que teñen as administracións públicas”.
