O grupo municipal do PP no Concello de Vigo esixiu este luns “explicacións” ao goberno local de Abel Caballero despois de confirmarse que a proposta presentada para optar a unha axuda de 6 millóns de euros na segunda convocatoria do PERTE para o ciclo da auga quedou fóra das subvencións, ao non estar entre as mellor puntuadas.

Os ‘populares’ lamentaron este “novo fracaso” da xestión do goberno vigués e lembraron que o propio alcalde garantiu a finais de 2023 que a axuda sería concedida, “froito, segundo presumiu, da súa relación con Pedro Sánchez”.

Agora, sinalaron, confirmouse que o proxecto VigWater, promovido desde a concesionaria Aqualia, foi desestimado por falta de fondos e por ter menor puntación que as 50 iniciativas seleccionadas. Tras lembrar que Vigo xa quedou fóra na primeira convocatoria do PERTE, o PP pediu a Caballero que aclare “se o goberno local renunciará a este proxecto ou o acometerá con recursos propios e da concesionaria”.

Para o portavoz do PP, Miguel Martín, quedou demostrado que a Abel Caballero “non lle importa mentir abertamente aos vigueses para inflar a súa xestión a base de falsidades”. Respecto diso, lembrou que o pasado 11 de decembro o alcalde daba por feita a concesión da axuda a pesar de que se trataba dun proceso en concorrencia competitiva que aínda tardaría meses en resolverse, nun “intento de coarlla” aos cidadáns.