O secretario xeral do PSdeG, José Ramón Gómez Besteiro, pediu explicacións ao presidente do PP e expresidente da Xunta, Alberto Núñez Feijóo, e ao actual líder autonómico, Alfonso Rueda, sobre o modelo escollido para o Hospital Álvaro Cunqueiro de Vigo, ao ser “responsables das decisións”.

Todo iso tras coñecerse este mércores o Informe de Fiscalización do Contrato de Concesión do Hospital Álvaro Cunqueiro de Vigo publicado por Contas, que conclúe que sería máis eficiente licitar a obra e os servizos do centro por separado, e non conxuntamente como levou a cabo a Xunta, xa que suporía un aforro de máis de 470 millóns de euros (IVE incluído).

“Teñen que explicalo de forma clara e inmediata. Xa están a tardar”, reivindicou Besteiro, lamentando a “falta de transparencia” e a “opacidade na contratación” que denuncia o documento relativo ao hospital, cunha “redución de superficie sen modificar o prezo á baixa”. Por todo iso, o PSdeG presentou unha batería de medidas no Parlamento de Galicia para solicitar ao Goberno autonómico explicacións en sede parlamentaria.

Sobre o estudo que levará a cabo o Tribunal de Contas, debido que o informe do Consello de Contas será enviado a este organismo, Besteiro dixo que os socialistas estarán “atentos” por se hai “responsabilidade de alcance ás contas públicas”, porque “todo parece indicar que si”, xa que son “cifras moi importantes” e decisións “de dubidosa transcendencia legal”.

“SOBRECUSTO DE 470 MILLÓNS”

Pola súa banda, o alcalde de Vigo, Abel Caballero, lembrou que en 2015 “máis de 200.000 persoas” saíron á rúa en protesta do modelo elixido para o hospital. “Son 470 millóns de euros de sobrecusto deste hospital que pretenden que sexa unha achega financeira a Vigo. Non, non, o hospital tivo 470 millóns de custo por encima do debido que lle deron a un fondo de investimento voitre francés”, criticou o rexedor olívico.

Por iso, pedíu explicacións non só ao actual presidente autonómico, senón tamén a Feijóo. “Queremos saber por que o fixeron. Por que tomaron esta decisión que 200.000 persoas nunha manifestación cuestionamos abertamente. E falábannos das enormes virtudes do modelo. Pois o modelo era tan calamitoso que o propio Feijóo non o volveu a utilizar nunca máis”, engadiu.

RESPOSTA DA XUNTA

O conselleiro de Sanidade, Antonio Gómez Caamaño, preguntouse “cantas mortes” se terían producido durante a pandemia do Covid-19 se o Hospital Álvaro Cunqueiro de Vigo estivese aínda en construción por optar por un modelo 100% público.

Gómez Caamaño, desde un punto de vista da medicina, valorou que supuxo para os vigueses e en xeral para os galegos elixir a colaboración público-privada para a construción do hospital. Segundo el, de optar por un modelo 100% público tardouse “moito máis” en construílo.

Respecto diso, lembrou que o Cunqueiro se desenvolveu “en menos de 5 anos”, mentres que a alternativa pública tardaría “entre 8 e 15 anos”, indicando que o hospital de Lugo, cun investimento menor, tardou oito anos.

CATALUÑA

Por outra banda, o secretario xeral do PSdeG, José Ramón Gómez Besteiro, considera que o pacto dos socialistas con ERC en Cataluña “non pon en cuestión” nin a solidariedade nin o principio de igualdade de trato entre españois. “Creo honestamente que eses principios non están en cuestión“, dixo este venres.