O PP de Vigo instou este luns ao alcalde, Abel Caballero, a que medie no conflito entre a empresa e os traballadores da UTE Zonas Verdes, concesionaria municipal do servizo de Parques e Xardíns do Concello de Vigo, solicitándolle á súa vez que “non quede mudo” tras unha semana de folga indefinida. En nota de prensa, o portavoz municipal ‘popular’, Miguel Martín, pediu ao rexedor que “actúe”, xa que pasou “marxe máis que suficiente” para que o goberno local trate de mediar, aínda que Caballero “non dixo nada”, nin tampouco os responsables da Concellaría.
Martín lamentou que é a cidade a que “vive as consecuencias”, xa que os empregados esparexeron lixo por zonas verdes e polas praias de Vigo, “no peor momento do ano” e aínda non foi limpado polo Concello. O PP insistiu en que o Concello debe “tomar medidas” e mediar entre ambas as partes para evitar un “dano na imaxe” que levan os turistas.
“ENSUCIAN A CIDADE”
Ante estas declaracións, o goberno local saíu ao paso enviando un audio aos medios de comunicación do concelleiro de Parques e Xardíns, Ángel Rivas, quen criticou que os traballadores “ensucien a cidade” e “danen mobiliario público”.
Segundo el, o convenio de mantemento da cidade “está entre os mellores de España”, non só en canto a salarios, senón tamén en relación á xornada laboral e a outras prestacións, “excedendo o convenio nacional en máis dun 30%”.
