Tras o consello da Xunta de hoxe, o presidente Alfonso Rueda respondeu ao alcalde de Vigo, Abel Caballero, que o seu concello é o que “máis está a recibir” dos fondos europeos Next Generation que xestiona Galicia. E é que o rexedor olívico, nunha entrevista concedida o domingo á Cadea Ser, criticou a asignación “sectaria” de fondos europeos que considera que fai a Xunta porque “practicamente”, afirmou, non chegou nada ao Concello.

Rueda cre que este asunto “se constesta por si só” se se ten en conta que, tal e como afirmou o presidente, Vigo é o municipio “que máis fondos está a recibir”. Por tanto, enmarcou estas críticas de Caballero en que “aínda se está adaptando a ese novo clima” de colaboración entre ambas as administracións iniciado coa súa reunión hai dúas semanas.

“Creo que, como se está adaptando aínda, ás veces non lle sae ben de todo. Supoño que irá mellorando”, ironizou o titular da Xunta, quen rexeitou que haxa un “comportamento sectario” coa repartición dos fondos.