O deputado do grupo parlamentario socialista, Carlos López Font, rexistrou nas últimas horas unha solicitude na Cámara galega para reclamar da Xunta toda a información sobre a operación de compra do Teatro Cinema Fraga por 9,3 millóns, unha operación na que a administración autonómica achega o 51 % e a Deputación de Pontevedra o 49 % restante.

Segundo lembrou López Font, a solicitude prodúcese “ao non ter coñecemento do expediente que ampara esta adquisición” e, “o que é máis grave aínda, ao descoñecerse a tasación oficial” do inmoble.

Por iso, ao amparo do regulamento do Parlamento de Galicia, o deputado socialista pediu que se facilite ao seu grupo “copia completa de toda a documentación sobre a compra e, en especial, sobre a tasación oficial do inmoble”.

“Debería ser inmediata a contestación porque, en caso contrario, a Xunta estaría a ocultar información oficial”, advertiu Carlos López Font.