O alcalde de Vigo, Abel Caballero, urxiu á Deputación de Pontevedra a firma do convenio para o cofinanciamento da bancada de Gol do estadio municipal de Balaídos. Nun audio gravado e remitido aos medios de comunicación, o rexedor lembrou que hai dous meses o Concello enviou o convenio ao ente provincial e aínda “non hai resposta”. “Non o toman con moita présa e están a atrasar o proxecto”, criticou.

Caballero insistiu na importancia desta obra, indicando que canto antes se faga “mellor será para o Celta” e para os afeccionados ao fútbol. O alcalde prometera, no seu día, que toda a reforma de Balaídos estaría acabada en 2023, ano no que se celebrou o centenario do Celta. Con todo, aínda está pendente de iniciarse a reforma da bancada de Gol.

No mesmo audio, Caballero anunciou que enviou esta semana unha nova proposta de convenio á Deputación para o financiamento de diferentes obras na cidade, por un valor de 5 millóns de euros, do mesmo xeito que ocorría cando Carmela Silva (PSOE), presidía o goberno provincial.