“A Deputación de Pontevedra négase a axudar aos afectados de Tui”. É a denuncia que fixo este xoves o presidente da Xunta, Alberto Núñez Feijóo, tras ser cuestionado polas críticas realizadas pola presidenta desa institución, Carmela Silva, que este mércores acusou ao Goberno galego de conxelar os convenios e axudas coa deputación que preside ante a proximidade das eleccións.
“Non sei de que axudas fala. Debería concretar de que se trata”, protestou Feijóo na rolda de prensa posterior ao Consello da Xunta ao ser preguntado por esta cuestión. Ademais, acusou ao organismo provincial de ser o responsable de non ter unha boa coordinación co Goberno galego. “É difícil facer algo coa deputación se non concretan as axudas ou o que queren”, indicou.
Neste sentido, lembrou o encontro que mantivo este mércores co alcalde de Tui e dixo que o rexedor lle trasladou a “nula” colaboración que existe por parte da Deputación de Pontevedra cos afectados da explosión pirotécnica de Paramos.
