Os grupos políticos da oposición no Concello de Vigo denunciaron este xoves o “silencio” do goberno local ante a orde xudicial de ingreso en prisión para o exfuncionario condenado por ‘enchufar’ á cuñada de Carmela Silva, e esixiron responsabilidades políticas e explicacións.
Por parte do PP, referiuse a esta cuestión o candidato, membro da lista de Marta Fernández-Tapias, Miguel Martín, que constatou que este caso, no que a familiar de Silva cobrou máis de 100.000 euros por un traballo que nunca realizou, “é o maior escándalo de corrupción política rexistrado nunca en Galicia“.
Así mesmo, denunciou as “presións” a asociacións e entidades da cidade para que se adherisen á petición de indulto do condenado (petición que a Audiencia deu por desestimada, ao non haber resposta do Goberno transcorrido máis dun ano). “O caso é dunha gravidade máxima… É que alguén se cre a estas alturas que este funcionario contratou á cuñada da tenente de alcalde e presidenta da Deputación sen unha orde previa?”, dixo.
MAREA DE VIGO E BNG
Pola súa banda, o portavoz de Marea de Vigo, Rubén Pérez Correa, sinalou que os motivos que esgrimía o condenado para acceder ao indulto eran “imposibles”. Do mesmo xeito, subliñou que é “absolutamente denunciable” que representantes de varias asociacións da cidade, algúns sen o conocimimento do resto de membros das súas entidades, asinasen a adhesión á solicitude de indulto.
Respecto diso, reclamou “responsabilidades políticas” a quen “tentou mover ese indulto” e tamén “sociais” aos presidentes dos colectivos que asinaron ese documento “infame” con “argumentos partidistas”.
Finalmente, o concelleiro do BNG no consistorio olívico, Xabier Pérez Igrexas, tamén lamentou que o goberno local socialista “non deu ningunha explicación á cidade sobre o maior caso de corrupción da historia do Concello”, que supuxo o “roubo de 108.000 euros de diñeiro público” para contratar a unha familiar directa de Silva.
Para o edil nacionalista, o “silencio” do goberno municipal é “intolerable en termos de hixiene democrática”, como tamén o é “a negativa do PSOE a condenar este caso”. “É claro e evidente que as clamorosas relacións persoais que envolven o caso non foron casualidade”, sinalou.
