O senador do Grupo Parlamentario Popular por Pontevedra Javier Guerra anunciou unha batería de iniciativas na Cámara para urxir ao Goberno que dote de máis persoal á comisaría de Vigo-Redondela, ante o “aumento da delincuencia” na cidade.
Nun comunicado, Guerra lembrou que, nun só ano, a delincuencia incrementouse en Vigo un 30%, tal e como se recolle no último balance de criminalidade do Ministerio do Interior, correspondente ao terceiro trimestre de 2022.
Así, entre xaneiro e setembro do ano pasado, o municipio rexistrou 9.634 delitos, 35 diarios, fronte aos 7.450 que se denunciaron no mesmo período de 2021. Para o senador, isto evidencia “a necesidade de maior dotación policial para garantir a seguridade dos máis de 300.000 habitantes aos que custodia a Policía Nacional”, que tamén engloba o municipio de Redondela.
Guerra indicou que “o 45% da estatística delincuencial de Galicia sopórtaa Vigo“, pero criticou que o persoal non se adaptou a ese crecemento. “O caso de Vigo é un dos máis clamorosos, xa que só terá unha nova praza de policía de escala básica, fronte ás 10 previstas na Coruña, as 5 para Santiago de Compostela”, lamentou.
