InicioPolíticaO BNG reclama ao Goberno que investigue a denegación de auxilio á...

O BNG reclama ao Goberno que investigue a denegación de auxilio á tripulación do “Manuel Laura”, con varios casos de Covid

A CIG denuncia "caos" e "falta de coordinación" na atención á súa chegada a Galicia.

PUBLICADO O

O deputado do BNG no Congreso, Néstor Rego, rexistrou este mércores varias preguntas dirixidas ao Goberno sobre o ocorrido en Irlanda ao pesqueiro ‘Manuel Laura’, ao que se lle “denegou auxilio” a pesar de ter a bordo casos sospeitosos de Covid.

O buque partiu en dirección a Gran Sol para faenar e, en plena travesía, un dos 12 tripulantes (todos foron vacinados antes de partir) comezou a estar indisposto e outros mariñeiros presentaban síntomas de infección por coronavirus. Tras contactar co Centro Radio Médico de Madrid, o barco puxo rumbo ao porto irlandés de Castletownbere seguindo o protocolo, para reclamar atención médica. Con todo, as autoridades locais non lles prestaron ese auxilio, alegando falta de medios para desprazar aos enfermos a un hospital, e “imcumplindo o Regulamento Sanitario Internacional”.

O barco, con bandeira británica e capital galego, e cuxa tripulación procede maioritariamente da zona do Morrazo, regresou a Galicia e atópase atracado no porto de Vigo desde este martes. Tras a realización das probas PCR, confirmouse que 9 tripulantes teñen COVID, dos que tres foron ingresados no hospital Álvaro Cunqueiro, mentres que o resto permanece illado.

Segundo apuntou Néstor Rego, “o Goberno do Estado español debería actuar de forma inmediata ao coñecer o caso, a través do Ministerio de Asuntos Exteriores, ante o Goberno irlandés, para que se puxesen a disposición dos tripulantes os medios sanitarios adecuados”.

O deputado do BNG sinalou que “non consta que se fixese xestión algunha desde o Goberno español ou o galego para mediar ante Irlanda“, e reclamou que, agora que o pesqueiro xa está de regreso en Galicia, o Executivo “esixa que se investiguen os feitos” e adopte “medidas contundentes” ante o ocorrido. “Coa súa actuación, as autoridades de Irlanda, país membro da UE, puxeron en risco a vida dos mariñeiros”, criticou.

“CAOS” NA ATENCIÓN Á SÚA CHEGADA A VIGO

Pola súa banda, o sindicato CIG denunciou este mércores o “caos” e o “atraso” co que foi atendida a tripulación do ‘Manuel Laura’ á súa chegada a Vigo, “por un problema de competencias”, xa que o barco ten bandeira británica.

Así, o representante do sector do MAR na FGMAT, Xavier Aboi, censurou que non houbese “ninguén nin de Sanidade Exterior nin do Sergas” para recibir a estes mariñeiros, e que a primeira ambulancia chegou dúas horas despois de que o pesqueiro atracase, mentres que a segunda tardou outra hora máis, cun profesional para facerlles proba PCR. Tamén puxo de manifesto a “falta de coordinación” para evacuar aos enfermos máis graves.

Aboi criticou que os 9 tripulantes que non foron evacuados (seis deles con Covid) quedáronse illados no propio barco e reclamou que poidan facer a corentena nos seus domicilios, hoteis ou na propia Casa do Mar. “É unha barbaridade que os obriguen a permanecer no reducido espazo do barco”, lamentou.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...