A Consellería de Medio Ambiente liberou un exemplar de paxaro arao común atopado a finais de xullo nas Illas Cíes. O exemplar de arao fora atopado nos arredores do Lago dos Nenos con síntomas de desnutrición, ferido e desorientado.

O exemplar foi enviado ao Centro de Recuperación de Fauna Silvestre de Cotorredondo, onde estivo 12 días.

Agora, técnicos e traballadores de Medio Ambiente farán un seguimento do arao liberado, tras colocarlle un anel metálico na súa pata como dispositivo de identificación.

Este distintivo permite aos científicos recoller datos dos movementos migratorios das aves, as taxas de mortalidade e a morfoloxía de certas especies, para desenvolver estudos e medidas de conservación.

O arao é unha especie de ave mariña frecuente en Galicia durante o inverno, pero no pasado contaba cunha forte presenza de colonias moi numerosas nas Cíes. A día de hoxe só existen dúas parellas de arao que aniñen e se reproduzan na Península e localízanse en Camariñas (A Coruña).