Un grupo de pescadores da Guarda deseñaron dous dispositivos metálicos pensados para salvar a vida a tartarugas que son capturadas de forma accidental polos bancos de palangre na manobra de izado a bordo.
A iniciativa, pioneira en España, naceu dun curso impartido no ano 2018 por unha organización medioambientalista orientado a paliar os efectos das capturas non buscadas por parte dos barcos pesqueiros.
Así, o sistema, bautizado como ‘Salvatortuga’, está adaptado ás particularidades dun barco de palangre e os distintos tipos e tamaños de tartaruga que adoitan atoparse.
Deste xeito, en colaboración cun ferreiro da localidade guardesa, deseñáronse dous dispositivos pensados para ocupar pouco espazo no barco e facilitar o izado das tartarugas por parte dos guindastres dos pesqueiros, que chegan a atoparse con exemplares de máis de 125 quilos.
Estes sistemas xa foron rexistrados e patentados, polo que a intención é que todos os barcos da Organización de Palangreiros Guardeses (Orpagu) conten con cada un dos artefactos antes de que conclúa o ano.
A organización destaca que, con isto, “a supervivencia das tartarugas mariñas capturadas está practicamente garantida” dado que a maioría dos exemplares ten os anzois cravados en lugares onde a extracción “é factible” para o seu posterior soltado unha vez recibidos os coidados necesarios.
