As instalacións do porto pesqueiro de Vigo acollen dende este luns e ata o venres unha experiencia piloto destinada a facilitar a conciliación das familias que traballan arredor do sector marítimo-pesqueiro. Trátase dun campamento de verán promovido pola Asociación Nacional de Mulleres da Pesca (ANMUPESCA), coa colaboración da Autoridade Portuaria de Vigo e FUNDAMAR.

A proposta nace coa intención de responder ás dificultades que poden atopar os profesionais do sector para compatibilizar os seus horarios laborais co coidado dos menores durante as vacacións escolares. Ao mesmo tempo, servirá para analizar o funcionamento deste tipo de servizos e estudar a súa posible implantación futura noutros portos do Estado.

Nesta primeira edición participan 20 nenos e nenas de entre 3 e 12 anos, cun horario comprendido entre as 8.00 e as 15.30 horas. Segundo explicaron fontes da Autoridade Portuaria, o programa busca ofrecerlles “unha inmersión directa no día a día e o patrimonio do porto a través dun programa de actividades adaptado”.

O campamento combina as actividades de lecer cun achegamento ao funcionamento dunha das principais infraestruturas pesqueiras de Galicia. Entre as propostas inclúense visitas guiadas polo porto pesqueiro, nas que os participantes poden coñecer como se desenvolve a actividade diaria, dende a chegada das capturas ata a poxa e os procesos posteriores de comercialización.

Tamén están previstos obradoiros prácticos sobre os produtos procedentes das rías galegas, cos que a organización pretende achegar aos menores tanto os recursos mariños como os distintos traballos vinculados á cadea pesqueira.

A programación presta igualmente atención aos oficios tradicionais e actuais do porto, co obxectivo de explicar ás novas xeracións a diversidade profesional que existe arredor da actividade marítima e pesqueira.

Outro dos eixos do campamento é a educación ambiental. Os menores participan en xogos e dinámicas didácticas relacionadas coa protección do ecosistema mariño e co coñecemento do espazo portuario e industrial que rodea a terminal viguesa.