O CEIP do Hío e a Asociación Cultural O Furatoxo organizan un encontro coas veciñas e veciños da parroquia do Hío o vindeiro xoves 3 de xaneiro ás oito do serán na Casa da Unión para falar sobre a contaminación nas augas.
O director do centro, Claudio Lamosa, e máis algunha representante do alumnado presentarán o proxecto no que levan traballando os dous últimos cursos académicos sobre a calidade da auga.
Grazas ao estudo que veñen realizando, tanto a través de probas técnicas coa supervisión de profesionais do sector como grazas a recollida de información do alumnado casa a casa, poden afirmar que as augas fecais das vivendas da parroquia do Hío contaminan a ría de Aldán.
Comezaron o estudo coa idea de mellorar a situación dun río e unha lagoa, a de Vilariño, presuntamente contaminada, e atopáronse con que a contaminación incide directamente sobre a ría.
Están en condicións de demostrar que os verquidos suceden dende o ano 2009, e cunha gran regularidade que coincide cos períodos de pluviosidade por enriba dos 75 l/m2 (dato que se supera practicamente en todos os meses invernais). Actualmente, o alumnado está desenvolvendo un plan de accións para mitigar a situación.
Dende o pasado decembro, as nenas e nenos de oito a doce anos atópanse realizando enquisas a familiares e veciñas para determinar a condición das conducións augas fecais. Do mesmo xeito, están xestionando con Augas de Galicia e ADEGA un plan de erradicación da Herba de Pampa, unha especie invasora que se estendeu pola lagoa de Vilariño, que incluirá alumnado, veciñas e veciños, empresas privadas e Concello.
Na mesma liña, tamén traballan na idea de crear un estanque de macrofitas para depurar as augas pluviais da escola e amosarlle á parroquia unha actuación que melloraría o estado da ría de Aldán.
Diante do momento preciso no que se atopan do proxecto, dende a Asociación Cultural O Furatoxo cren relevante que o CEIP do Hío poida presentar o traballo que leva feito e o camiño que seguirán neste acto público. Así, o proxecto poderá saltar dende as aulas do centro ás casas da parroquia de forma moito máis sinxela.
Durante este proxecto, o alumnado e profesorado do CEIP do Hío contou coa colaboración do INTECMAR, Augas de Galicia, UTE- Xestión-Cangas (FCC Aqualia y Civis Global), Confraría de Aldán e do propio Concello de Cangas do Morrazo.
Pola súa banda, a AC O Furatoxo nace no ano 2013 formada por mozas e mozos do Hío coa intención de dinamizar a parroquia. Dende a súa creación veñen apostando pola organización de actividades para todos os públicos.
