O xeólogo Óscar Pazos acaba de informar do descubrimento das primeiras ouriceiras fóseis (icnofóseis de Paracentrolus lividos) de Galicia. É un tipo de fósil pertencente ao icnoxénero Circolites e que se terían formado no Eimiense, o último interglaciar, entre 130.000 e 115.000 anos.

Estas ouriceiras fóseis están na praia da Calzoa, na parroquia de Coruxo en Vigo, xusto no penedo no que hai chantadas unhas duchas, e foron identificadas o pasado mes de decembro de 2025. Trátase do primeiro fósil deste tipo achado en Galicia e o segundo atopado en toda a costa atlántica ibérica. Os máis cercanos (e xeomorfolóxicamente correlacionables) están nos Monumentos Naturais Locais das Pedras Ruivase do Acantilado de Montemor, no Geoparque Litoral de Viana, en Portugal.

“Estes da Calzoa son os primeiros descritos na costa atlántica en granito, unha rocha moito mais resistente do que o xisto no que se atopan os de Portugal“, sinala Óscar Pazos. Os icnofóseis de Paracentrolus lividos sitúanse aproximadamente no nivel de marea alta viva, e, por tanto, marcan un nivel do mar máis alto do actual, tentativamente do último intergalciar Eemiense. O pequeno resto de praia fósil no cantil a uns cen metros ao suroeste (en dirección á boca da ría), corrobora a posición do nivel do mar eeminao nesta altura da costa, hai, aproximadamente 120.000 anos.

NON SE DESCARTAN NOVOS ACHADOS

“Embora con escasos desenvolvementos, nos rochedos entre a podese tamén apreciar os evidentes restos da rasa de erosión eemiana na posición marcada entre os iconfóseis e a base da praia fósil”, indica. Pazos non descarta que aparezan novos icnofóseis nesas rasas eemianas, tal vez hoxe tapados pola area, solos ou vexetación.

O xeólogo salienta que toda esa zona de Coruxo é un excepcional recurso xeopatrimonial de interese paleontolóxico, paleoambiental e xeomorfolóxico de ámbito local, xa que, ao propio valor natural do icnofósil, engadese a proximidade da pequena praia fósil e dos miúdos mais consistentes restos da rasa de erosión eemiana.

O Eemiense ( Último Interglaciar, MIS 5e) foi un período climático cálido que aconteceu aproximadamente entre hai 130.000 e 115.000 anos, antes da última gran glaciación (Würm),caracterizado por un clima máis cálido que o actual, niveis do mar máis altos e casquetes de xeo máis pequenos, sendo un referente clave no estudo do quencemento global.