Os niveis de contaminación do aire en Vigo alcanzaron á 1 da madrugada un preocupante pico de 79 µg/m³ de PM2,5, segundo os últimos informes ambientais de Meteogalicia e as catro estacións situadas en Vigo marcan niveis malos, salvo a de Coia que marca un dato peor “moi mala”. Este nivel supera amplamente as recomendacións da Organización Mundial da Saúde (OMS), que suxire un límite de 15 µg/m³ como promedio anual e 25 µg/m³ como promedio diario para garantir a saúde pública.
As partículas PM2,5, debido ao seu pequeno tamaño, poden penetrar profundamente nos pulmóns e entrar na corrente sanguínea, causando unha serie de problemas de saúde. Entre os efectos máis preocupantes están os problemas respiratorios, como a asma e a bronquite, así como un aumento no risco de enfermidades cardiovasculares e accidentes cerebrovasculares.
A OMS advirte que a exposición prolongada a altos niveis de PM2,5 está relacionada cun aumento na mortalidade prematura. A AEMET recomenda tomar precaucións, como evitar actividades ao aire libre en momentos de alta contaminación.
A situación non parece mellorar ao longo do día, coa chegada dunha masa de aire queten procedente de áfrica.
A XUNTA RECOMENDA NON REALIZAR ACTIVIDADES AO AIRE LIBRE
Así as cousas, a conselleira de Medio Ambiente e Cambio Climático, Ángeles Vázquez, recomendou a colectivos de risco que non realicen actividades continuadas no exterior debido á mala calidade do aire en zonas como Vigo e Costa da Morte. En declaracións aos medios de comunicación, Vázquez recoñeceu que a calidade do aire que se respira empeorou nas últimas horas na área de influencia de Vigo e da Costa da Morte debido ao fume que chega desde os incendios do norte de Portugal.
Segundo dixo, este pasado mércores o fume era visible en altura, pero non afectaba o aire que respiran os cidadáns. Con todo, isto cambiou este xoves, empeorando a súa calidade. Por iso, dixo que desde o Goberno galego continúanse realizando medicións e enviou unha mensaxe aos colectivos de risco para que procuren non levar a cabo actividades continuadas no exterior en zonas como Vigo ou Costa da Morte.
Ángeles Vázquez destacou que unha vez máis se constata que o problema do clima é “global” e sucesos que ocorren noutros países poden afectar o resto do mundo. “Ter o control a través das estacións situadas nos distintos lugares de Galicia dános a oportunidade de previr e é do que se trata. Facer a prevención para que despois non teñamos problemas. Estamos nesa fase de prealerta, polo que queremos trasladar a mensaxe á cidadanía, ademais do apoio aos nosos veciños portugueses”, sentenciou.
