O BNG rexistrou iniciativas nas Cortes Xerais para solicitar que a Illa de San Simón, na ría de Vigo, sexa declarada e protexida como “lugar de memoria democrática” tras ser un “triste escenario da represión franquista”. Así o avanzou a senadora do Bloque, Carme da Silva, quen pregunta tamén a opinión do Goberno central sobre esta proposta e sobre “se se está respectando a condición relativa ao acceso público e gratuíto” a esta illa, en vista de diferentes actividades que se celebran alí (por exemplo, concertos) “a cargo de empresas privadas”.

Segundo explicou Da Silva, a concesión vixente actual que ten a Xunta estipula que San Simón, que ten a declaración de ben de interese cultural (BIC), “non poderá dedicarse a usos distintos dos incluídos”, quedando “expresamente prohibido o uso hoteleiro”. Neste contexto, dado o pasado deste espazo vinculado á represión franquista, o BNG reclamará ao Estado que a illa sexa declarada “lugar de memoria democrática”, unha figura que contempla a nova lei aprobada en 2022 e que debe promover de oficio a dirección xeral competente na materia.