O delegado do Goberno, Pedro Blanco, mantivo unha videoconferencia este luns co alcalde de Tui, Enrique Cabaleiro, na que abordaron a conmemoración do 800 aniversario da consagración da Catedral de Tui.

Segundo trasladou a Delegación, ambos coincidiron en sinalar este acontecemento, que se celebrará o 1 de decembro do ano 2025, como unha oportunidade para promocionar e situar a cidade a nivel cultural e artístico.

Os obxectivos que se pretenden conseguir con esta celebración son resaltar o valor histórico e artístico da Catedral, fortalecer a súa portancia e a súa promoción, así como mellorar as condicións de conservación do monumento. Ademais, tamén propoñen a celebración dun encontro entre os Gobernos de España e Portugal para resaltar a importancia da Catedral na Península Ibérica.

Sobre o Camiño de Santiago, o Concello quere facer visible a condición da Catedral de Tui como unha das principais localizacións do Camiño Portugués, xa que recibe anualmente máis de 120.000 peregrinos de múltiples nacionalidades.

En canto ás accións permanentes, preténdese renovar a iluminación exterior do monumento, eliminar o cableado da contorna monumental e crear unha infraestrutura de apoio para os visitantes.

Por outra banda, buscarase a presenza en Tui dunha exposición de ‘As idades do Home’ no ano 2026, así como o deseño dun espectáculo de luz como atracción cultural e turística e un congreso científico.