O Parque Nacional Marítimo-terrestre Illas Atlánticas de Galicia presentaranse dun modo “atractivo e accesible” nunha nova guía de viaxe que conta para o seu desenvolvemento co apoio da Xunta, a través dunha liña de axudas financiadas con fondos europeos ‘Next Generation’.

Será unha guía que mostrará lugares de interese natural de cada un do catro arquipélagos –Cíes, Ons, Sálvora e Cortegada– e que contará coa colaboración do medio de divulgación científica ‘Gciencia’, que habilitará un apartado específico na súa páxina web. Tamén estará dispoñible en formato PDF no portal do propio parque.

A publicación, titulada ‘Parque Nacional Illas Atlánticas de Galicia. Un mar de ciencia, un mar de illas’, permitirá aos usuarios descubrir os lugares máis emblemáticos de cada zona, comprender a historia e etnografía do territorio, así como a flora e a fauna destes ecosistemas.

Desta maneira, tal e como destaca a Xunta, os visitantes poderán explorar as praias, miradoiros, enclaves naturais e outros puntos de interese a través dun relato que irá máis aló do valor paisaxístico das illas.

Ademais, esta guía contará con mapas detallados de cada unha das rutas e información esencial para preparar a viaxe a cada un dos arquipélagos: como chegar, onde pasar a noite e onde comer. Xunto a isto, daranse indicacións sobre como evitar danos á contorna protexida.