A Policía Local de Ponteareas e a Garda Civil identificaron na tarde deste xoves a un individuo como presunto autor de danos en tres árbores plantadas recentemente nas obras do camiño escolar seguro na rúa Trobador Xoán García de Guillade.

Segundo trasladou o Concello, varias persoas alertaron á Policía Local destes feitos e, tras desprazarse ata o punto, comprobaron os danos causados, tres árbores recentemente plantadas partidos pola metade.

Así, procederon a identificar á persoa que presuntamente ocasionou os danos, segundo relataron testemuñas presenciais, que tamén achegaron gravacións do ocorrido.

Ademais, esta mesma semana, axentes da Policía Local do municipio tamén identificaron e denunciaron por un delito contra o patrimonio a dúas persoas autoras de pintadas en edificios públicos.