Con respecto aos comentarios “ameazantes” de cazadores durante os días posteriores aos campionatos de caza de raposos que se desenvolveron o día 12 nas catro provincias, LIBERA! fixo efectiva unha denuncia ante a Fiscalía Provincial da Coruña, deixando que o Ministerio Fiscal investigue e cualifique a posible responsabilidade penal de ameazas de morte.
Ademais, o achado dun can atado no termo municipal do Porriño, que faleceu días despois, por parte de axentes de Seprona da Comandancia da provincia de Pontevedra, así como as posteriores dilixencias, foi valorado pola Asociación Animalista Libera e a Fundación Franz Weber, a pesar do triste final do animal.
Os animalistas aproveitaron este caso para denunciar a permanencia dunha práctica de crueldade explicitamente ilegalizada na Lei de Benestar Animal de Galicia que, despois dun ano en vigor, aínda non deu resposta aos centos de casos que se acumulan na comunidade, e que no caso destes colectivos, suman máis de 380 situacións documentadas.
A través da campaña #SinCadenas estas organizacións propoñen unha auténtica “man dura administrativa” por parte da Consellería de Medio Ambiente co obxectivo de sancionar o encadenamento permanente co máximo previsto na normativa, 5000 euros, así como empezar a incluír as sancións accesorias, entre as que se atopa a inhabilitación para a tenencia de animais.
O caso do Porriño non é illado, como denuncian FFW e LIBERA!, e de feito nos últimos tempos xurdiron iniciativas veciñais para disuadir a persoas de manter aos cans en condicións deplorables, con cadeas e cordas que provocan profundas feridas, sen refuxio ou sen alimento adecuado, que se suma a outras infraccións, onde se atoparía tamén a carencia do preceptivo microchip identificador.
