O XIX Festival de Cans, celebrado este pasado fin de semana, recibiu máis de 10.000 persoas no seu regreso ás datas primaverais. A metade do público pasou pola parroquia da localidade do Porriño o sábado, día grande do festival, no que a organización destacou que houbo “un gran ambiente” e “un comportamento exemplar” por parte de quen asistiu.
Segundo trasladou a organización, a principal afluencia produciuse nos concertos nocturnos de Amparanoia o venres e de Dakidarria e Los Vinagres o sábado, que encheron a carpa habilitada para a ocasión cunhas 1.500 persoas.
Á marxe dos concertos, resaltou tamén o “multitudinario” ‘Coloquio na Leira’ co director Daniel Monzón, ao que asistiron unhas 300 persoas que puideron coñecer máis das experiencias do cineasta mallorquino, autor de películas como Las leyes de la frontera ou Celda 211.
Ademais, tamén subliñou a “emoción e alegría” vivida na entrega dos ‘chimpines’ de prata ao actor Federico Pérez, o crítico cinematográfico Javier Tolentino e á veciñanza Marisol Troncoso e Alfonso González, xunto co premio de honra Pedigree 2022 á cineasta Margarita Ledo.
A pesar da “gran afluencia de xente” que se achegou a Cans, a organización subliñou que a aldea non viviu en ningún momento sensacións de abafo, cos espectadores repartidos nos “máis de dous quilómetros de perímetro por toda a aldea”.
