A presión hospitalaria por enfermos de covid-19 incrementouse en Galicia, con sete pacientes máis este xoves, así como os contaxios por coronavirus, un total de 821, en vésperas do inicio do fin de semana festivo no que as autoridades sanitarias instaron a extremar as medidas de seguridade pola pandemia.
Segundo os datos do Servizo Galego de Saúde (Sergas) das 18:00 horas deste xoves, pese ao incremento de pacientes en hospitais e ao repunte de contaxios, continúa descendendo o número de persoas con infección activa, aínda que a un ritmo menor que os días anteriores, con 390 menos, até situarse en 15.156.
PRESIÓN HOSPITALARIA
En total hai nos hospitais galegos 324 persoas ingresadas enfermas de covid-19, das que 269 están en planta, tres máis que o mércores, e 55 na UCI, catro máis. A área sanitaria de Vigo, acumula 53 hospitalizados (-1) con sete en UCI (+1).
INCIDENCIA
Desde o inicio da epidemia en Galicia contaxiáronse 169.077 persoas e recuperáronse 151.443, das que 1.207 foron na última xornada. A cifra de falecidos ascende a 2.508, tras o catro mortes comunicadas polo Sergas nas últimas horas.
Por áreas sanitarias, o descenso de casos é xeneralizado, sobre todo na de Vigo, con 95 menos, o que sitúa a cifra en 3.715.
