A Sección Segunda da Audiencia provincial de Pontevedra resolveu mediante un acordo de conformidade un xuízo por un delito continuado de estafa agravada en concurso con outro delito continuado de falsidade en documento mercantil.

O acusado, F.C.R., director de recursos humanos dun grupo empresarial do Porriño, conformouse co relato de feitos da acusación particular e aceptou ser condenado a catro anos de cárcere e ao pago dunha multa de seis euros diarios durante dez meses.

A contía da responsabilidade civil ascende a 150.382 euros. A sentenza é firme e contra ela non cabe recurso.

En virtude deste acordo considéranse feitos probados que o procesado presentou facturas elaboradas por el ou por un terceiro ao departamento financeiro para incorporar o diñeiro ao seu patrimonio.

Segundo o relato que fai a Fiscalía no seu escrito de acusación, o home presentou varias facturas entre 2013 e 2015 “que aparentaban reflectir operacións que na realidade non existiran, que foran confeccionadas por el ou por un terceiro, sendo plenamente consciente o acusado da súa total falta de veracidade”.

“Deste xeito lograba que o grupo de empresas, crendo estar a abonar servizos realmente prestados, pagaba cantidades monetarias que a continuación o acusado facía súas; ou ben eran destinadas ao pago dos seus gastos persoais”, relata a Fiscalía.