O responsable dun hotel-club de alterne situado en Mos acusado dun delito contra os dereitos dos traballadores negou que 29 mulleres estivesen a traballar no local sen estar de alta na Seguridade Social.

A Sección cuarta da Audiencia de Pontevedra deixou este xoves visto para sentenza o xuízo contra o dono do club no ano 2014, que se enfronta a unha pena de tres anos de cárcere e o peche do local durante cinco anos, motivo este último polo que sentou no banco xunto ao actual administrador da empresa, tamén acusado.

Segundo declarou durante a vista oral, estas persoas “non facían ningunha función para a empresa” aínda que para a Fiscalía está probado que estaban a exercer “labores de alterne” neste local coñecido como hotel-club ‘Peinador’. Os axentes da Policía Nacional que declararon no xuízo tamén sostiveron que estas mulleres ofertaban servizos de prostitución.

A Fiscalía mantén que, en data 23 de outubro de 2014, o acusado deu ocupación laboral neste local a 41 traballadores, dos cales só 12 estaban dadas de alta pola citada empresa (dous porteiros, cinco camareiros, un encargado, tres limpadoras e o encargado de seguridade e administrador do establecemento).

Así, o Ministerio Público sostén que “debían someterse ao réxime laboral imposto polo acusado” consistente en respectar os horarios de apertura e peche do local, “atraer ou servir de reclamo aos clientes para incitarlles ao consumo de copas”, de cuxo prezo total o club quedaba con 10 euros sendo para a traballadora a cantidade restante e “descontándoselle ademais 5 euros polo uso das sabas e entrega de preservativos”.

Ante o tribunal tamén declararon como testemuñas catro das mulleres afectadas, que aseguraron ser só “hóspedes” dese hotel-club co que aínda manteñen esa relación.

Trátase dun testemuño radicalmente oposto á versión dos feitos que no seu día ofreceron á Policía Nacional e os inspectores de traballo.

Para xustificar esta contradición, as mulleres explicaron que os funcionarios as entenderon mal “por culpa do idioma” e mesmo chegaron a soster que os axentes recolleron declaracións que elas non fixeron.