A candidata de Unidas Podemos Cambiar Europa, Vanessa Angustia, demandou no Porriño (Pontevedra) un Plan Integral de descontaminación do lindano, ante o “abandono dos poderes públicos”.
Nun acto de campaña, no que estivo acompañada por Pedro Ocampo, candidato á alcaldía de EU Son Porriño, lembrou que Esquerda Unida trasladou tanto á Xunta como á Comisión Europea a súa preocupación debido á necesidade de adoptar medidas ante o problema derivado deste pesticida.
Vanessa Angustia remarcou que existen medios dispoñibles para que as comunidades autónomas planifiquen estratexias de descontaminación e denunciou a “desidia da administración, que non fixeron ningunha actuación efectiva para eliminar os residuos do lindano”.
“Preguntámonos: Hai diñeiro, hai proxecto… para cando un plan integral de descontaminación de lindano que garanta a saúde das persoas do Porriño?”, cuestionou Angustia.
