Xornal de Vigo (XdV) é xa o primeiro gran xornal dixital de Vigo e a súa área metropolitana segundo a clasificación de Alexa (auditora da empresa Amazon). Unha posición que acadou en oito meses de vida e sendo, ademais, o primeiro gran medio en utilizar íntegramente o idioma galego.
Desde o seu nacemento, o pasado 1 de maio, XdV converteuse xa nun referente informativo da principal urbe de Galicia con informacións sobre actualidade política, económica, cultural, deportiva e social de todo o sur de Pontevedra e unha visión diferente a dos grandes medios de comunicación. De feito, presta especial atención a aqueles grandes problemas da cidade que outros xornais pasan por alto ou evitan publicar.
Así, a problemática sanitaria en Vigo, os problemas con Povisa ou Citröen, a pobreza social da cidade ou a polémica coas luces do Nadal foron algúns dos temas máis vistos o pasado ano en Xornal de Vigo.
Xornal de Vigo naceu asociado a Galicia Confidencial (GC), o principal medio dixital en galego e un dos máis importantes no panorama mediático dixital de Galicia, só por detrás de La Voz de Galicia e Faro de Vigo. Ambos os dous contan cun acordo para intercambiar información, publicidade e aspectos técnicos. Un acordo que tamén se fai extensivo a outros xornais locais e comarcais que tamén xa son todo un referente na provincia de Lugo como son Xornal da Mariña, Lugo Xornal e Xornal de Lemos.
Calquera persoa, entidade, asociación, partido político ou concello que queira ter voz neste xornal só ten que escribir a redaccion@xornaldevigo.gal Agardamos, como ata o de agora, a vosa participación para contar o que outros calan ou non queren contar.
