O movemento de mercadorías ata outubro aumentou no acumulado do ano en todos os portos galegos de titularidade estatal salvo no de Vigo. En total, superaron os 28,64 millóns de toneladas transportadas, segundo os datos de Portos do Estado.
Na Coruña, foron 11,9 millóns de toneladas ata outubro, un 24,4 % máis; en Ferrol-San Cibrao 9,72 millóns, un 15,53 % máis; en Vigo 3,88 millóns, un 1,78 % menos; en Marín e Ría de Pontevedra 1,84 millóns, un 4,61 % máis; e en Vilagarcía 1,3 millóns, un 4,5 % máis.
No conxunto estatal, os 46 portos de interese xeral do Estado, xestionados por 28 Autoridades Portuarias e coordinados por Portos do Estado, moveron 472.828.187 toneladas entre xaneiro e outubro de 2022, o cal representa un incremento do 4,56 % respecto ao mesmo período do ano anterior.
