A xunta de goberno local do Concello de Vigo aprobou este xoves as bases para convocar oposicións municipais, polo que levará a cabo un proceso selectivo para cubrir ata 63 prazas de emprego público.

Tal como informou o alcalde, Abel Caballero, a intención do Concello é celebrala no prazo de tempo “máis breve posible”. Ademais, reivindicou que en menos de tres anos xa se incorporaron ás filas municipais máis de 260 persoas, tanto para cubrir prazas que quedaron libres por xubilación como polo incremento do persoal público.

Así mesmo, Caballero sinalou que a xunta de goberno local tamén asinou o nomeamento de 15 novos efectivos de Policía Local que chegaron a Vigo por promoción horizontal, é dicir, trasladados doutros municipios de España.

Neste sentido, lembrou que recentemente se cubriron 46 prazas por oposición, polo que Vigo dispón de 61 novos axentes locais. Ademais, o Diario Oficial de Galicia (DOG) publicou tamén as bases dunha nova convocatoria de oposición con 36 novos axentes para Vigo, dos cales 25 serán de oposición libre e oito de mobilidade horizontal.