O Consello da Xerencia de Urbanismo de Vigo aprobará inicialmente este martes o Plan Especial de Reforma Interior (PERI) dun ámbito entre Navia e O Caramuxo, onde se construirá unha área industrial e comercial a cargo da promotora Global Fitness Sport.
A actuación atrasouse ao longo dos anos polos litixios enre a promotora e os residentes nun poboado chabolista nesa zona, pero este martes recibirá a luz verde inicial do Concello.
Segundo explicou o alcalde, a promotora actuará en case 31.000 metros cadrados, para crear unha trama urbana que dea continuidade ao barrio de Navia, con áreas industriais e de uso terciario, e case 300 prazas de aparcadoiro.
Abel Caballero trasladou que o PERI terá a súa aprobación definitiva ao longo do ano e as posteriores obras de urbanización teñen un prazo de execución doutros dous anos.
