Astilleros San Enrique, antes Factorías Vulcano, anunciou este xoves a firma do seu primeiro contrato para a construción dun barco: un arrasteiro de 80 metros de eslora para a armadora PescaChile.

O estaleiro vigués confirmou a firma dese contrato, no marco da celebración da feira Navalia, para construír un buque arrastreiro por 35 millóns de euros, no proceso de renovación da frota de PescaChile.

Marina Meridional, dona de San Enrique, sinalou que o contrato en firme executarase ao longo de 18 meses de traballo, e entrará en fabricación “tras a optimización das instalacións do estaleiro en Vigo”.

“Con este contrato iniciamos os traballos de Astilleros San Enrique de nova construción naval, contando para a súa construción cunhas 200 persoas, incluídas máis de 15 subcontratas. Sentímosnos, por tanto, moi satisfeitos”, proclamaron desde a empresa.

Así mesmo, o conselleiro delegado de Marina Meridional, Juan Moreno, avanzou “moi boas expectativas”, xa que están a ultimar o peche doutros proxectos, “tanto de nova construción naval como industrial”.