O vicepresidente económico da Xunta, Francisco Conde, visitou este venres, xunto ao alcalde do Porriño, Manuel Alejandro Lorenzo, as instalacións de Distribuciones Pako, afectadas por un incendio declarado o pasado mércores no Polígono da Granxa do Porriño.
Conde trasladou aos responsables da empresa que “contan co apoio da Xunta para que poidan recuperar canto antes toda a súa actividade”. Segundo explicou, nestes momentos estase en fase de avaliación de danos para cuantificar as perdas na compañía, que se dedica á venda e distribución de maquinaria e útiles para sondaxe, minaría e instrumentación, e que ten oito empregados.
O conselleiro, que agradeceu a actuación dos servizos de extinción no incendio, púxose a disposición de Distribuciones Pako para ofrecer o asesoramento que necesiten e os apoios precisos a través de préstamos estratéxicos para pemes (cunha bonificación da taxa de interese) mentres non se executan as pólizas de seguro.
