O BNG de Vigo propuxo que o Concello encargue de forma urxente un estudo para valorar a constitución dunha empresa municipal de servizos que asuma a xestión directa do bus urbano na cidade, ante a situación da actual concesionaria, Vitrasa, que anunciou un descolgue salarial ante o risco de quebra.
Así, tras as “presuntas perdas millonarias” da empresa, que propuxo ao seu persoal unha rebaixa salarial do 30% e incrementar a súa xornada laboral anual, a fronte nacionalista urxiu ao goberno de Abel Caballero a actuar porque “se está xogado cun servizo esencial” e tamén, “de maneira inxustificada, arbitraria e irresponsable”, coas condicións de traballo do persoal da concesionaria.
Así o trasladou o concelleiro do BNG, Xabier Pérez Igrexas, tras manter un encontro con membros do comité de empresa de Vitrasa, e advertiu de que non hai constancia, á vista das contas de 2021 rexistradas pola empresa, de que estea acreditado o desequilibrio financeiro que argumenta Vitrasa para reducir soldos.
“Estamos diante dun evidente exercicio de enxeñaría contable para fabricar un escenario de perdas que xustifique novamente a petición de transferencias económicas para esta empresa privada”, denunciou Pérez Igrexas, que censurou a falta de medidas por parte do Concello e preguntou a Abel Caballero “que vai facer” á marxe de “declaracións” e “boas paalabras”, que “non van frear este abuso laboral”.
Pola súa banda, o membro do comité, Javier Fernández (CIG), afirmou que o servizo de bus está en mans dunha empresa “cun ánimo de lucro desmesurado, reducindo servizos, pedindo millóns de euros por vía xudicial ao Concello e agora empobrecendo o persoal”.
