O sector da imaxe persoal (barbarías, barberías, salóns de estética, etc.) volveu a saír á rúa, esta vez en Vigo, para reclamar novamente a redución do IVE ao 10 %, e insistiron en que a situación deste colectivo é “insustentable”. Medio centenar de persoas manifestáronse polo tramo peonil da rúa Urzáiz, para concluír cunha concentración ante a sede da agrupación do PSOE, onde corearon consignas como “somos traballadores, non recadadores” ou “o IVE reducido era o prometido”.
A portavoz do colectivo, Josefa Alonso, lamentou que o mantemento dese imposto no 21 % desde 2012, a pesar de que “no seu momento aceptouse porque se dixo que ía ser temporal”, supuxo a perda de miles de emprego en España, e que a inmenza maioría dos empresarios estean “a traballar só para pagar facturas”.
Segundo apuntou, case todos os negocios tiveron que prescindir dos seus empregados ou, no mellor dos casos, “quedar só cun”, e insistiu en que “non se pode aguantar máis”. Na mesma liña, o perruqueiro Marcos Valverde lamentou que o sector sexa “vetado” polo PSOE, e lembrou que, nas súas reivindicacións, teñen o apoio do resto de grupos políticos.
Sonia Guisande, pola súa banda, subliñou que este colectivo “non está a pedir nada que xa non fose seu”, e insistiu en que a necesidade de volver do 21 ao 10 % é “urxente”, posto que a situación do sector agravouse agora máis pola subida do prezo da luz. No seu caso, explicou, pasou de pagar algo máis de 200 euros de electricidade a 400 euros.
