A Confederación de Empresarios de Galicia (CEG) reclama ao Executivo “que se rehabilite para a súa reapertura ao tráfico o máis axiña posible e con todas as garantías de seguridade” o túnel do Folgoso na Cañiza en sentido a Madrid, co obxecto de “paliar canto antes” o impacto económico e social que está a provocar este peche no sur de Galicia.

“Resulta intolerable que despois de permanecer pechado desde o pasado 25 de xaneiro debido ao incendio dun camión, o Goberno anuncie que a reapertura deste túnel –central na arteria de comunicación que vertebra todo o seu territorio desde Vigo á meseta–, aínda se demorará como mínimo ata o mes de maio”, censura a patronal galega.

Nun comunicado, advirte de que “o desvío de tráfico incrementa a viaxe en ao redor de media hora máis e sen outra alternativa existente, coa consecuente perda de tempo e diñeiro para os usuarios particulares e transportistas”. Todo iso, lamenta, “contribúe a prexudicar aínda máis a xa de seu deteriorada competitividade das empresas galegas”.

Así mesmo, a CEG tamén reclama ao Goberno “a mellora íntegra das estradas N-120 e N-559, vías por estanas transcorrendo desde o mes de xaneiro os usuarios que en circunstancias normais transitarían a través deste túnel da Autovía das Rías Baixas”.

POSTURA DO GOBERNO

Doutra banda, respecto da proposta para habilitar de forma bidireccional o carril cara a Vigo, o delegado do Goberno en Galicia, Javier Losada, remarcou que con iso a Xunta “expón algo que non permite a normativa, a Unión Europea nin o sentido común, que é a circulación bidireccional”.

Así o trasladou este luns nunha entrevista na Cadea Ser, na que lembrou que o túnel sufriu “unhas importantes desfeitas, sen danos persoais grazas ao labor da Garda Civil e dos Bombeiros”.

As tarefas de reparación que se están realizando inclúen iluminación, ventilación, vixilancia, reposición do sistema de radiocomunicacións, recableado dos sistemas de seguridade, rehabilitación das tubaxes e bajantes, repintado, limpeza e reposición das marcas viarias.

Na mesma entrevisa, Losada tamén apuntou que espera que a apertura dos servizos de atención ao viaxeiro na estación Vialia en Vigo “dea un novo impulso á alta velocidade” e subliñou o “compromiso para potenciar a saída ferroviaria sur de Vigo e a posta en marcha do tren de alta velocidade desde Vigo”.