A planta do Grupo PSA Peugeot Citroën en Vigo pechará do 24 de decembro ao 3 de xaneiro polo período vacacional de Nadal nun contexto no que se manteñen a “inestabilidade” e a “incerteza” no mercado.

Así o detallaron fontes da dirección da fábrica, que trasladaron ao comité de empresa que as vacacións se estenderán desde o 23 ao 31 de decembro para os equipos de mañá, tarde e noite, que regresarán ao traballo o primeiro día laborable, o 4 de xaneiro. Habitualmente, a actividade na planta viguesa retómase tras Ano Novo.

Mentres, o 23 de decembro será o último día de traballo do ano para a quenda de fin de semana, que tamén terá actividade o 8 de decembro, Día da Inmaculada Concepción e festivo.

Así mesmo, o equipo de noite traballará o segundo domingo de decembro –o primeiro, día 6, é festivo– nos dous sistemas durante 7 horas e media. A quenda de noite tamén prestará actividade nos dous sistemas o 8 de decembro en lugar da noite do 7 de decembro.

Durante o encontro tamén se actualizou a información correspondente ao rexistro de salarios medios do ano 2019 tras o cumprimento dos trámites legais realizados coa representación dos traballadores durante a negociación do convenio colectivo 2020-2023.

Así, incluíronse os valores medios desagregados por sexos e grupos profesionais, que confirmaron a igualdade salarial, que a dirección da planta achacou a “as contratacións e evolucións profesionais das mulleres no centro”. De todos os xeitos, o rexistro de salarios analizarase anualmente.