A Xunta de Galicia agradeceu este martes as palabras do ministro de Transportes, Mobilidade e Axenda Urbana, José Luís Ábalos, sobre o apoio do Goberno central ao Corredor Atlántico de mercadorías, pero advertiu de que esas palabras se deben transformar en “feitos concretos e avances”.
Así o trasladou a conselleira de Infraestruturas e Mobilidade, Ethel Vázquez, nunha rolda de prensa tras manter unha reunión de traballo co presidente da Autoridade Portuaria de Vigo, Enrique López Veiga.
A conselleira reiterou que o Corredor do Noroeste debe ter “o mesmo trato” que o Corredor Mediterráneo, e reclamou que ese compromiso afirmado polo ministro tradúzase en “feitos”. A ese respecto, en referencia aos Orzamentos Xerais do Estado para 2021, Ethel Vázquez advertiu de que “de nada serve que haxa partidas (para ese Corredor Atlántico) se non hai proxectos, e hai que avanzar tamén nos proxectos construtivos”.
A ese respecto, a titular autonómica de Infraestruturas e Mobilidade lamentou que, “vendo os antecedentes”, a Xunta está “preocupada” porque os investimentos e proxectos se desebvikvab no Levante español. “O Corredor Atlántico é unha aposta irrenunciable (…) e hai unha alianza estratéxica de comunidades que a defenden”, lembrou, en referencia a Galicia, Asturias e Castela e León.
No marco desa aposta, Ethel Vázquez destacou dúas actuacións “imprescindibles”, como son o saída sur ferroviaria de Vigo e, vinculada a ela, as conexións por tren da terminal portuaria de Bouzas e da Plataforma Loxística de Salvaterra-As Neves (Plisan).
“Se o Goberno fala de reconstrución, que mellor proxecto en Galicia para saír máis fortes da crise que o Corredor Atlántico. Hai unha imperiosa necesidade, e os fondos europeos de reconstrución teñen uns prazos moi concretos. O que queremos é que se poñan as pilas”, proclamou.
SAÍDA SUR
A conselleira lembrou que o Goberno dispón “desde hai meses” do estudo de custo-beneficio sobre o saída sur ferroviaria de Vigo, cuxas vantaxes son “indiscutibles”; e que as conexións de Bouzas e a Plisan están a esperar avances desde 2018.
No actual contexto de crise pola pandemia de coronavirus, Ethel Vázquez instou a impulsar esas actuacións, aproveitando os fondos europeos de reconstrución, que son unha “oportunidade” e que, ao seu xuízo, non deben servir para “que se agrande a brecha” entre o Atlántico e o Mediterráneo.
